Новости

Дали „заштедите“ во буџетот државата започна да ги прави врз грбот на најмаргинализираните?

Со кратење на буџетот за превенција од ХИВ за 40 %, Министерството за здравство го става на коцка здравјето на најмалку 10.000 засегнати граѓани

На скандалозен и паушален начин, без каква било стручна дискусија, Министерството за здравство скрати дури 40 % од средствата предвидени за превенција на ХИВ во Програмата за заштита на населението од ХИВ-инфекција за 2022 година, која Владата ја усвои пред само еден месец. Со тоа, државата ги става во ризик од згаснување воспоставените капацитети за контрола на ХИВ-инфекцијата во земјава и го загрозува здравјето на најмалку 10.000 граѓани од маргинализираните заедници.

Наместо предвидените 46,5 милиони денари во Програмата за заштита на населението од ХИВ-инфекција наменети за услугите за превенција на ХИВ што ги спроведуваат околу 14 здруженија во 12 града во земјава, Министерството за здравство завчера објави јавен повик за здруженија со износ намален за дури 19 милиони денари. За одлуката не е консултирана националната комисија за ХИВ.

Благодарение на овие програми, Република Северна Македонија во изминатите 15 години одржуваше целосна контрола на епидемијата на ХИВ во популациите на луѓе што инјектираат дрога и сексуални работници и една од најниските стапки на инфекција во регионот. Во изминатите 3 месеци целокупниот национален одговор кон оваа епидемија е буквално на товар на 14 граѓански организации, кои продолжуваат со работа без никаков надомест за својот труд.

Прекинувањето на услугите за ранливите групи ќе значи пораст на нови инфекции и пораст на смртни случаи поради ХИВ, а од друга страна и зголемен притисок врз клучни здравствени институции, како што се Клиниката за инфективни болести и центрите за лекување на зависности. Дури и мал пораст на епидемијата на ХИВ ќе доведе до многукратно зголемување на трошоците за лекување и здравствена грижа. Оттука, одлуката за арбитрарно кратење едноставно е лоша јавно-здравствена политика.

Услугите за ХИВ што ги нудат граѓанските организации ги воспостави Министерството за здравство од 2005 до 2017 година со поддршка од Глобалниот фонд за борба против СИДА, кој има инвестирано 25,7 милиони долари за градење на националниот одговор кон ХИВ во земјата. Тие опфаќаат теренски и стационарни услуги за анонимно ХИВ-тестирање, советување, дистрибуција на средства за превенција на ХИВ и други крвно и сексуално преносливи инфекции, дијагностика и третман на сексуално преносливи инфекции, мобилни гинеколошки услуги, поддршка на луѓето што живеат со ХИВ и луѓето што се лекуваат од зависност од дрога и други комплементарни услуги. Од 2018 година, по завршувањето на надворешната финансиска поддршка, Владата на Република Северна Македонија формално го презеде како своја обврска финансирањето на услугите за превенција на ХИВ за групите изложени на поголем ризик и во своите политики се обврза да ја гарантира одржливоста во иднина.

Во Македонија сè уште млади луѓе умираат од ХИВ, а според методологија на Европскиот центар за контрола на болестите се проценува дека дури една третина (34 %) од вкупниот број лица што живеат со ХИВ во земјава не се свесни дека го имаат вирусот. Со ова Македонија значително заостанува зад просекот на светско ниво, кој за 2020 година изнесувал само 16 %. Глобалната цел до 2025 година е процентот на лица што не се свесни дека имаат ХИВ да се сведе на помалку од 5 %, што ќе доведе до драстичен пад во преносот на инфекцијата и ќе овозможи да се стави конечен крај на епидемијата на ХИВ до 2030 година.

Свесни за војната во Украина, каде што губиме наши пријатели и колеги, свесни за последиците од ковид-19 и за енергетската криза, алармираме дека мора да се одржи здравствената заштита за сите граѓани, вклучително и на најмаргинализираните, чие здравје се одразува и врз здравјето на целата популација. Превенцијата кај ранливите групи и кај младите не смее да биде жртва на политики за рационализација на државниот буџет. Во спротивно, порастот на епидемијата на ХИВ само ќе ги зголеми трошоците, а државата ќе плати со губење на човечки животи.

Имајќи ја предвид алармантната ситуација и повикувајќи се на обврските на земјата од Политичката декларација за ХИВ и СИДА на Обединетите нации од јуни 2021 година, вклучително и обврската за ставање крај на епидемијата на ХИВ, како и на обврските преземени од Владата да се обезбеди континуитет на програмите за ХИВ, бараме:

  1. Итно да се коригира објавениот јавен повик за здруженија што ќе ги спроведуваат активностите за превенција на ХИВ во согласност со износите предвидени во Програмата за заштита на населението од ХИВ-инфекција за 2022 година, усвоена од Владата во февруари годинава;
  1. Владата и Собранието конечно да го гарантираат континуитетот на веќе воспоставениот систем за заштита од ХИВ. Тоа значи: Собранието без одложување и во целост да ги усвои измените на Законот за здравствена заштита кои се во собраниска процедура, а се однесуваат на механизмот на вклучување на здруженија во спроведувањето на здравствените програми, а Министерството за здравство да развие подзаконски акти со кои ќе ги исполни обврските од заклучоците усвоени од Владата во септември 2017 година и обврските од претходната и тековната Стратегија на Владата за соработка и развој на граѓанскиот сектор;
  1. Поради големото доцнење на објавата на јавниот повик, Владата и Министерството за здравство преку интервентна поддршка да ги надоместат трошоците на здруженијата за првото тримесечје од 2022 година настанати поради нивното посветено одржување на националниот одговор кон ХИВ.

Информации за контакт:

Здружение за поддршка на луѓето што живеат со ХИВ – ЗАЕДНО ПОСИЛНИ Скопје, Андреј Сених тел. 070 344 693

Здружение ХОПС – Опции за здрав живот Скопје Хајди Штерјова Симоновиќ, 070 400 096 ХЕРА – Асоцијација за здравствена едукација и истражување Скопје, Елизабета Божиноска  078 396 186

Eдукативна програма за млади на Здружението ЗАЕДНО ПОСИЛНИ Скопје – ПОВИК ЗА УЧЕСТВО

Ако си млад геј или би маж, на возраст помеѓу 19 и 27 години,

ако си мотивиран да придонесеш за подобар квалитет на живот во својата заедница,

ако си заинтересиран за најновите, научно поткрепени и релевантни информации за сексуалното здравје на геј и би мажите, влучувајќи теми како: недетектабилно – непреносливо, ПрЕП, ПЕП, chemsex и многу други,

ПРИЈАВИ СЕ ЗА УЧЕСТВО во едукативната програма на Здружението ЗАЕДНО ПОСИЛНИ Скопје.

—–

Здружението ЗАЕДНО ПОСИЛНИ Скопје објавува повик за заинтересирани учесници во едукативна програма која е осмислена специјално за млади од заедницата на геј и би мажи.

Цел на оваа едукативна програма е група млади геј и би мажи, кои се мотивирани да бидат активни во својата заедница, да стекнат најнови, со докази поткрепени и релевантни познавања за различни аспекти поврзани со сексуалното здравје, вклучувајќи и ХИВ, како и вештини што ќе им помогнат да делуваат во своите заедници за поголема свесноста за ХИВ како проблем, подобра грижа за сексуалното здравје и уживање во побезбедна и исполнувачка сексуалност.

Програмата, исто така, настојува да ги поттикне младите да се ангажираат како активисти во областа на ХИВ и сексуалното здравје, во рамките на својата заедница или пошироко.

Кој може да се пријави?

Оваа иницијатива е наменета за млади лица на возраст помеѓу 19 и 27 години што се идентификуваат како геј и би мажи, кои изразуваат соодветна мотивација за учество во програмата и за активирање во рамките на својата заедница. При селекцијата ќе се внимава на разнородноста на учесниците во однос на етничката припадност, географската поврзаност и разликите по други основи.

Еднакво се охрабруваат за едукативната програма да се пријават млади лица со ХИВ-позитивен, како и со ХИВ-негативен статус.

Сите трошоци за обуката ќе бидат покриени од ЗАЕДНО ПОСИЛНИ.

Програма

Едукативната програма е развиена од Здружението ЗАЕДНО ПОСИЛНИ во консултација со стручни лица, како и со млади припадници на заедницата на геј и би мажи.

Темите што ќе бидат опфатени ги вклучуваат:

различните аспекти на сексуалното здравје; ПрЕП и новите пристапи во заштитата од ХИВ; недетектабилниот статус и (не)преносливоста на ХИВ; chemsex; историјата и наследството на ХИВ- и ЛГБТ-активизмот низ филм и дискусија; како се лекува и контролира ХИВ-инфекцијата; како да се препознаат, дијагностицираат и лекуваат сексуално преносливите инфекции и други.

Содржините што ќе бидат покриени се засновани врз најновите докази од клинички и други истражувања во областа на превенцијата и лекувањето на ХИВ и сексуално преносливите инфекции. Обуката ќе ја водат искусни врснички едукатори и стручни соработници на Здружението ЗАЕДНО ПОСИЛНИ Скопје.

Оваа обука ќе има социјален и едукативен карактер според методите на неформалното образование, вклучувајќи интерактивни вежби, групни дискусии, симулации, анализа на филм, дебати и др.

Кога ќе се одржи обуката?

Обуката ќе се спроведе во два дела. Првиот дел од обукатa ќe биде дводневна работилница од 25-ти до 27-ти март а вториот дел ќе се одржи на 9-ти и 10-ти април. И двете работилници ќе се одржат надвор од Скопје.

Обуките и превозот ќе бидат организирани запазувајќи ги протоколите за заштита од КОВИД-19.

Вклученост по обуката

Учесниците што ќе ја поминат обуката ќе добијат можност директно да се вклучат во последователни креативни волонтерски акции на Здружението, како и во ангажмани со соодветен надомест. Дел од заинтересираните кандидати што успешно ќе ја завршат обуката ќе имаат можност да се вклучат и како даватели на услуги во ЗАЕДНО ПОСИЛНИ и во други здруженија.

Како да се пријавам?

Заинтересираните млади лица коишто ги исполнуваат критериумите може да се пријават до 15.3.2022, пополнувајќи го овој краток прашалник: https://forms.gle/3tx5XUkjqEZqTUyAA

Напомена:

Учеството во едукативната програма е целосно доверливо.

Личните податоци се обработуваат во согласност со правилниците за заштита на личните податоци на Здружението ЗАЕДНО ПОСИЛНИ Скопје и на Законот за заштита на личните податоци. Податоците што ги оставате во оваа пријава се исклучиво за спроведување на процесот за избор на учесници и ќе бидат избришани по завршувањето на повикот.

Доколку имате потреба од дополнителни информации обратете се на телефонскиот број +389 78 235 632 или преку e-mail на [email protected]

——-

Оваа иницијатива е дел од годишната програма на Здружението ЗАЕДНО ПОСИЛНИ Скопје финансиски поддржана од Европската Унија. Активноста има цел да придонесе (1) да се подобри вклученоста на млади геј и би мажи во адресирањето на прашања од областа на сексуалното здравје и ХИВ, и (2) да се зголеми свесноста за услугите за ХИВ и за сексуално здравје во рамките на заедницата на геј и бисексуални мажи и други мажи што имаат секс со мажи.

Исполнувањето на целта на оваа едукативна програма се очекува да придонесе за:

– Поголемо фактичко знаење во заедницата на геј и би мажи за ХИВ и сексуално преносливите инфекции

– Намалување на стигмата кон луѓето што живеат со ХИВ

– Зајакнување на културата за редовно ХИВ-тестирање и други проверки на сексуалното здравје

– Искористување на достапните бесплатни услуги за ХИВ и за сексуално преносливи инфекции

За ЗАЕДНО ПОСИЛНИ:

ЗАЕДНО ПОСИЛНИ е здружение на луѓето што живеат со ХИВ во Северна Македонија. Се води од визијата за општество во кое луѓето што живеат со ХИВ, како и сите други луѓе без разлика на здравствениот статус, се ослободени од стегите на стигмата и дискриминацијата и ги уживаат достигнувањата на науката за унапредување на своето здравје, ги поддржува луѓето што живеат со ХИВ во остварувањето на нивните права и дејствува за ставање крај на ХИВ и за подобро здравје за сите луѓе, преку обезбедување услуги во заедницата и насочување на јавните политики.

Повик за прибирање понуди: консултант за подготовка на процесот на национално стратешко планирање за ХИВ

Краен рок за пријавување: 19.12.2021 г.

Здружението за поддршка на луѓето што живеат со ХИВ – ЗАЕДНО ПОСИЛНИ Скопје објавува повик за прибирање понуди за ангажирање консултант што ќе го помогне процесот на национално стратешко планирање за ХИВ за периодот 2022-2026.

Оваа консултантската позиција е овозможена во рамките на регионалниот проект „Одржливост на сервисите за клучните популации во регионот на Источна Европа и Централна Азија“ (#SoS_project), кој е финансиски поддржан од Глобалниот фонд за борба против СИДА, туберкулоза и маларија, а чии активности на ниво на Р. С. Македонија се раководени од Здружението ЗАЕДНО ПОСИЛНИ Скопје и се насочени на поддршка на националниот одговор кон ХИВ, во консултација со Националната комисија за ХИВ.

1. Контекст

Република Северна Македонија е земја со ниско ниво на епидемија на ХИВ, при што епидемијата е концентрирана во рамките на клучни засегнати популации. Се проценува дека заклучно со крајот на 2020 година околу 500 лица живееле со ХИВ во Северна Македонија, од коишто само 66% биле свесни за својата инфекција, што е значително понизок од глобалниот просек за истата година, кој изнесува 84%. Од друга страна, согласно проценките на национално ниво, 90% од дијагностицираните лица на крајот на 2020 година примале антиретровирусна терапија, а дури 94% од нив имале супримиран вирус во крвта (глобален просек за 2020 г. – 87% и 90% соодветно).

Земјата досега развила и спровела вкупно три национални стратегии за ХИВ, кои се однесуваа на периодот 2007 до 2021 година. Следната национална стратегија треба да се однесува на петгодишниот период 2022-2026, а ќе биде развиена од мултисекторска работна група формирана од Министерот за здравство, преку консултација на сите заинтересирани страни, вклучувајќи го и граѓанскиот сектор и претставници на луѓето што живеат со ХИВ и на заедниците засегнати од вирусот. Покрај достапните докази и релевантни анализи на национално ниво, новата национална стратегија треба да ги земе предвид и глобалните стратегии, препораки, како и меѓународно преземени обврски на државата во однос на ставањето крај на епидемијата на ХИВ до 2030 година.

2. Опис на работните задачи

Од ангажираниот консултант се очекува да ги исполни следниве задачи:

  • Да спроведе анализа на релевантни документи за националниот одговор кон ХИВ и глобалните стратегии и препораки во однос на одговорот кон епидемијата;
  • Да подготви извештај од анализата кој ќе служи како контекст, односно анализа на состојбата, за потребите на националното стратешко планирање за ХИВ за периодот 2021-2026;
  • Врз основа на консултација  со заинтересирани страни во националниот одговор кон ХИВ да развие предлог-структура за националниот стратешки план за ХИВ;
  • Да изготви препораки за спроведување на националното стратешко планирање за ХИВ.

Проценет обем на консултантскиот ангажман: 10 консултантски денови

За својата работа консултантот одговара пред извршниот директор на Здружението ЗАЕДНО ПОСИЛНИ Скопје.

3. Профил и неопходни квалификации

Кандидатите треба да ги исполнуваат и следниве основни квалификации:

  • Диплома за завршено високо образование;
  • Одлично познавање на процесите на стратешко планирање и искуство како фацилитатор на процеси на стратешко планирање за најмалку три институции или организации;
  • Способности за планирање и организација и навремено исполнување на зададените задачи;
  • Изградена способност за тимска работа;
  • Одлично познавање на македонскиот и англискиот јазик.

4. Критериуми за избор

Предност за добивање на ангажманот ќе имаат кандидати со:

  • Претходно учество во процеси на национално стратешко планирање (независно од областа);
  • Претходно искуство во слични процеси поврзани со темите ХИВ и/или јавно здравје;
  • Повисок степен на исполнување на неопходните квалификации.

5. Временска рамка, надомест и други услови

Предвидениот обем на консултантскиот ангажман изнесува 10 (десет) консултантски дена. Спроведувањето на задачите наведени во точка 2 треба да заврши до 31 декември 2021 г. Ангажманот предвидува потпишување договор за консултантски услуги, а ќе биде надоместен со бруто износ од 130 американски долари во денарска противвредност за еден консултантски ден.

Со оглед на ограничената временска рамка за спроведување на ангажманот, предвидено е потпишување на договорот на 20 декември 2021 г.

Краен рок и потребни документи за пријавување

Најдоцна до 19.12.2021 г., заинтересираните кандидати треба да достават:

  • Изјава за интерес во која накратко ќе се осврнат на своите клучни квалификации што одговараат на условите на овој повик;
  • Професионална биографија, која ќе го прикаже работното искуство релевантно за овој повик.

Документите за пријавување на повикот со назнака „апликација – нац. стратегија ХИВ“ треба да се достават електронски, на следната е-маил адреса:

[email protected]

Постапка за избор на консултант

Комисијата за избор на консултант ќе ги разгледа примените апликации, при што предвид ќе бидат земени само оние пријави коишто ја содржат комплетната документација и ги исполнуваат условите на повикот. Комисијата ќе изработи ранг листа на кандидати. Со најмногу двајца најдобро рангирани кандидати може да биде спроведено интервју. Во зависност од резултатите од оценката на документација наспроти условите на повикот и евентуалното интервју ќе биде избран консултантот кому ќе му биде доделен ангажманот.

ПОВИК за ангажирање консултант за статистичка обработка, анализа и интерпретација на клиничките и бихејвиоралните податоци добиени преку пилот студија за предекспозициска профилакса.

Скопје, 07 декември, 2021

Рок за пријавување: до 15 декември 2021 г.

Контекст

Имајќи го предвид непостоењето на каква било формална услуга за предекспозициска профилакса (ПрЕП) за ХИВ во Северна Македонија, Здружението ЗАЕДНО ПОСИЛНИ Скопје, во соработка со нашиот партнер Универзитетската клиника за инфективни болести и фебрилни состојби, во јануари 2021 започна со имплементација на пилот-студија за воведување на ПрЕП во Северна Македонија со назив „Воведување на предекспозициска профилакса (ПрЕП) за ХИВ во Северна Македонија: демонстрациски проект за утврдување на изводливоста и прифатливоста на обезбедувањето на ПрЕП како дел од зајакнувањето на услугите за сексуално здравје“ (понатаму: пилот-студијата), која ќе обезбеди основи за подобро да се разбере на кој начин здравствениот систем би можел да ја интегрира ПрЕП во постојните услуги и да поттикне пристап до мошне потребните интервенции за да се преобратат актуелните растечки трендови на инциденцата на ХИВ во земјата. Пилот-студијата е дел од регионалниот проект „Одржливост на сервисите за клучните популации во регионот на Источна Европа и Централна Азија“ (#SoS_project), раководен од Алијансата за јавно здравје од Украина со финансиска поддршка од Глобалниот фонд за борба против СИДА, туберкулоза и маларија, чии активности на ниво на С. Македонија се спроведуваат од Здружението ЗАЕДНО ПОСИЛНИ Скопје.

Резултатите од пилот студијата за воведување на ПрЕП во Северна Македонија за 2021 ќе обезбедат соодветни докази за воведување на ПрЕП како редовна услуга од пакетот за сеопфатно сексуално здравје, подобрување на превентивните политики за ХИВ во Северна Македонија, како и подобро согледување на актуелните состојби со ХИВ и сексуално преносливите инфекции во рамки на популациите засегнати од ХИВ.

Овој повик за консултант се објавува со цел да се ангажира експерт кој ќе помогне во статистичката обработка и интерпретација на податоците собрани од тековната студија.

Консултантска позиција

Овој повик се однесува на следнава позиција:

Консултант за статистичка обработка, анализа и интерпретација на клиничките и бихејвиоралните податоци добиени преку пилот-студија за предекспозициска профилакса

 

Опис на работните задачи

Консултантот за статистичка обработка и анализа на клиничките и бихејвиоралните податоци треба да ги изврши следниве задачи, неопходни за евалуација и изготвување финален извештај и публикации од пилот-студијата:

  • Да примени соодветни статистички операции од дескриптивната и аналитичката статистика со цел обработка на податоците дефинирани со примарните и секундарните цели и примарните и секундарните одредници во протоколот на студијата, односно:
    • Дистрибуцијата на карактеристиките на двете интервенциски групи да ја спореди со χ-квадрат тест за категориски податоци и студентов t-тест или тест на збир од рангови за континуирани податоци,
    • Да ја истражи поврзаноста меѓу изборот на интервенциската стратегија и потенцијалните детерминанти со униваријантна и мултиваријантна анализа на логистичка регресија,
    • Мултиваријантното градење на модел да го изврши преку употреба на етапна обратна процедура, вклучувајќи ги сите променливи со униваријантна p-вредност помала од 0,10,
    • Да примени соодветни униваријанти и мултиваријантни статистички методи (Poisson, логистичка регресија), коригирани за повторни мерења кај поединци за да се истражат промените низ времето и поврзаните детерминанти,
    • Временските трендови и детерминанти да ги истражи преку униваријантни и мултиваријантни регресиони анализи;
  • Да изработи табеларни и графички прикази на податоците од студијата;
  • Да изготви детална интерпретација на сите податоци добиени преку статистичката анализа, соодветна за публикација;
  • Да подготви финален извештај во вид на комплетен приказ на резултатите од студијата и нивна соодветна интерпретација.

Консултантот има обврска при изготвувањето на анализите да ги следи насоките на истражувачкиот тим на пилот студијата.

 

Обем на ангажманот и временска рамка

Ангажманот на консултантот треба да се спроведе во периодот од 20 декември 2021 г. до 15 јануари 2022 г.

За извршување на ангажманот од консултантската позиција предвидени се 7 консултантски денови.

Надомест и други услови

По завршувањето на задачите соодветни за консултантскиот ангажман на консултантот ќе му биде исплатен бруто надомест од 150 долари во денарска противвредност за еден консултантски ден.

Профил и неопходни квалификации

Кандидатите треба да ги исполнуваат следните основни квалификации:

  • Универзитетска диплома
    • Одлично познавање на компјутерските програми Excel и SPSS или STATA или еквивалентни програми
    • Не помалку од 3 години искуство во научна или стручна работа со примена на статистичка обработка на податоци
    • Претходно искуство од работа на анализи релевантни за конкретниот ангажман
    • Одлично познавање на англискиот јазик

Критериуми за избор

Изборот ќе се спроведе врз основа на нивото на исполнување на неопходните квалификации за овој повик, како и следниве критериуми за предност:

  • Универзитетска диплома од областа на медицината или медицинските науки или јавното здравје;
  • Искуство во областа на јавното здравје, медицината или статистика во здравствениот сектор.

Краен рок и потребни документи за пријавување

За пријавување на повикот заинтересираните кандидати треба да ја достават својата професионална биографија, во која особено ќе ги истакнат потребните квалификации за избор и релевантното научно и стручно искуство, на следната е-маил адреса: [email protected] со назнака „ПрЕП-МКД_статистичка анализа“.

Пријавата може да вклучи публикувани материјали и/или друга претходна стручна работа на кандидатот релевантна за овој конкретен повик (во форма на линк или прилог).

Контакт лице за овој повик е Виктор Симеоновски, проектен координатор за ПрЕП во ЗАЕДНО ПОСИЛНИ: е-маил адреса: [email protected].

Краен рок за пријавување на повикот е 15 декември, 2021 г.

Повик за ангажирање консултант за изработка на кодекс на однесување и процедура за заштита при повредување на кодексот

Датум на објавување: 30 септември 2021 г.
Краен рок: 7 октомври 2021 г.

Здружението за поддршка на луѓето што живеат со ХИВ – ЗАЕДНО ПОСИЛНИ Скопје објавува повик за прибирање понуди за ангажирање консултант за развивање на кодекс на однесување и процедура за заштита при повредување на кодексот.  Кодексот, како внатрешна организациска политика ќе ги содржи основните вредности и правила на добро однесување во организацијата, во сите аспекти на нејзината работа. Кодексот ќе се однесува на членовите, вработените, давателите на услуги и волонтерите кои се вклучени во различни сегменти на работата на Здружението. Целта е со него да се осигури добра деловна комуникација, подобрени услови на работење и добар организациски имиџ.

Развивањето на Кодексот на однесување е овозможено во рамките на институционалниот грант од програмата Цивика Мобилитас.

Опис на ангажманот

Ангажираниот консултант ќе треба да ги исполни следниве задачи:

  • Да осмисли и фацилитира еден до три консултативни состанок со назначена работна група;
  • Врз основа на спроведениот консултативен процес да понуди препораки и насоки за развивање на Кодексот, што треба да обезбедат добра внатрешна и надворешна комуникација, доверба и интегритет во секојдневната работа во согласност со водечките принципи на Здружението;
  • Да достави предлог-документ во форма на внатрешна организациска политика со јасно изложување на дефинираните вредности и стандарди за успешна комуникација, правилно постапување со информации, одржување на доверливоста и интерна постапка за справување при прекршување на кодексот; Документот треба да биде концизен и не треба да биде подолг од 5 страници во Word со фонт Calibri и големина 12.
  • Да подготви финална верзија на Кодексот на однесување.

За својата работа консултантот одговара пред извршниот директор на Здружението ЗАЕДНО ПОСИЛНИ Скопје.

Профил и неопходни квалификации

Кандидатите треба да ги исполнуваат и следниве основни квалификации:

  • Диплома за завршено високо образование;
  • Искуство во спроведување на слични процеси во областа на организацискиот развој;
  • Способности за планирање и организација и навремено исполнување на зададените задачи;
  • Изградена способност за тимска работа;
  • Одлично познавање на македонскиот и англискиот јазик.

Критериуми за избор

Предност ќе имаат кандидати со:

  • Искуство во развивање организациски политики со сродна тематика и во сродни организации;  
  • Соодветна лична мотивација за конкретниот ангажман;
  • Повисок степен на исполнување на неопходните квалификации.

Временска рамка, надомест и други услови

Процесот на развивање на кодексот на добри практики и подготовката на финалниот документ треба да заврши до 31 октомври 2021 г. Ангажманот предвидува потпишување договор за консултантските услуги со покриен персонален данок на доход. Предвидениот надомест за овој ангажаман е во бруто износ од 27.500,00 денари.

Консултативните состаноци ќе се одвиваат он-лајн преку платформата ZOOM.

Краен рок и потребни документи за пријавување

Најдоцна до 7.10.2021 г., заинтересираните кандидати треба да достават:

  • Писмо за интерес (до 250 збора) во кое накратко ќе го образложат предложениот пристап што би го примениле и ќе се осврнат на личната мотивација за овој ангажман;
  • Професионална биографија, која ќе го прикаже работното искуство релевантно за овој повик.
  • Контакт за препорака од одговорно лице од граѓанска организација за која консултантот спровел релевантен процес од областа на развивање организациски политики или од областа на организацискиот развој: име и презиме, телефон и електронска пошта.

Документите за пријавување на повикот со назнака „Повик за консултант – кодекс на однесување“ треба да се достават електронски, на следната е-маил адреса:

[email protected]

Постапка за избор на консултант

Комисијата за избор на консултант ќе ги разгледа примените апликации, при што предвид ќе бидат земени само оние пријави коишто ја содржат комплетната документација и ги исполнуваат условите на повикот. Комисијата ќе изработи ранг листа на кандидати. Со најмногу тројца најдобро рангирани кандидати ќе биде спроведено интервју. Во зависност од резултатите од оценката на документација наспроти условите на повикот и евентуалното интервју ќе биде избран консултантот кому ќе му биде доделен ангажманот. Сите кандидати ќе бидат известени за резултатот од изборот по електронски пат во рок од 7 дена по затворањето на повикот.

ПОВИК за ангажирање консултант за развивање на комуникациска стратегија и протокол за комуникација

Датум на објавување: 18 август 2021 г.
Краен рок: 25 август 2021 г.

Здружението за поддршка на луѓето што живеат со ХИВ – ЗАЕДНО ПОСИЛНИ Скопје објавува повик за ангажирање консултант за развивање на комуникациска стратегија и протокол за комуникација на Здружението.

ПРОЧИТАЈ ПОВЕЌЕ

ПОВИК за ангажирање консултант за развивање веб-содржини за политиките за достапност на лекови во Северна Македонија

Датум на објавување: 21 мај 2021 г.
Краен рок: 28 мај 2021 г.

Здружението за поддршка на луѓето што живеат со ХИВ – ЗАЕДНО ПОСИЛНИ Скопје објавува повик за ангажирање консултант за развивање веб-содржини во врска со политиките за достапност на лекови во Северна Македонија наменети за веб-страната на Здружението.Целта на оваа активност е да се развие сегментот на веб-страната на ЗАЕДНО ПОСИЛНИ којшто се однесува на пристапот до лекови во Република Северна Македонија воопшто, со информации и осврти на актуелните политики за лекови, кој треба да служи уникатен ресурс од оваа област за пациентите воопшто и за граѓанскиот сектор.  

ПРОЧИТАЈ ПОВЕЌЕ